ناس كتير بتفتكر انك لما تحب نفسك وتفضلها يبقى انت كده اناني ويمكن نرجسي ، بس الحكايه طلعت مش كده خالص .! مفيش حاجه تقدر تكمل فيها او هدف حابب توصل له الا لو كان سببه الحب و مش كل الحب يبقى الحب ما بين طرفين وتنتهي بجوازطب والحب ده هيجي ازاي ؟
الحب هيجي لما تعرف قيمة نفسك وتسأل نفسك وهو انا محبش نفسي اصلا ليه؟ انا استحق الاحترام ، وتقبل الذات ، معرفة مميزاتي وحُبها وتقبل عيوبي وإصلاحها ، احترام مشاعري وتقديرها ، مسامحة الذات على اخطاء الماضي ، عدم جلد الذات بسبب الندم ، انا استحق التقدير و الحب ، استحق النجاح كلمات من عدة احرف قادره على تغيرك وتغير وجهة نظرك لبعض الاشياء و النظرات و الاشخاص نظرتك للناس هو انعكاسك الداخلي بما انت عليه من الاصل فمن يرى الناس بعين الجميل يرى الجمال ومن يرى بعين القبيح يرى القبح .
ازاي احب نفسي و أحسن علاقتي بيها ؟ راقب الطريقة اللي بتكلم بيها نفسك كل يوم وشوف بتقولها كلام حلو وايجابي ولا سلبي اكتر ؟
ولو سلبي ابدأ غير ده بكلمات حلوه كتير كل يوم لنفسك (انا جميل ، عندي ضحكه حلوه ، انا فخور بنفسي ، )لازم تقدر مشاعرك ومتتجاهلش اللي بتحس بيه لمًا يجي لك وقت متقدرش تبذل فيه مجهود متلومش نفسك و حاول تقدر جسمك ونفسيتك و اعتبر انه بريك وشويه و هترجع تبدأ تاني مثلا مش اخر الدنيا !
فكر دائما انك مش لازم تكون مثالي علشان مفيش حد مثالي و كامل في العالم يكفي انك تكون حقيقي و مش مؤذي للأخرين لو عايز تغير وجهه نظرك في حاجه غير تفكيرك ونظرتك عنها قبل تصرفك واعرف ان اما تغير نظرتك لنفسك للأحسن وتحبها وتعرف انها تستحق كل الحب ده هيغير نظرتك وموقفك تجاه شيء معين ف بالتالي تصرفك نحيته هيتغير فكر نفسك دائما بنقاط القوة اللي بداخلك و انجازاتك الصغيرة او الكبيره ولو مفيش ومش حاسس ب ده اصنع انجازات انت تحبها مش غيرك يحبها ، ودائما شجع نفسك وقول لها كلام حلو متستناش كلام حلو من الناس لان الناس علطول بتنظر للشيء بعيونهم هما مش بعيونك !
و ده هيخليك متقارنش نفسك بحد تاني غير نفسك لان كل واحد عارف قدراته و امكانياته وظروفه واحواله غير احوالك يعني متجيش تقارن ان الجندي كالاسد علشان اصلا ده بنأدم و ده حيوان ده بيعيش في المدينه وده في الغابه وتقول عايز ابقى شجاع زيه ! استمتع مع نفسك دائما ، اخرج معاها لوحدك ، فرحها ، اشتري ليها هديه ، و طبطب عليها اما تعيط او تقع ، انت لو مخوفتش عليها مين هيخاف !
لازم تعرف تقول كلمة ( لا ) مش عيب ولا حرام فالله لايكلف نفسا الا وسعها عادي وطبيعي انك تقول لا لشيء فوق طاقتك او وقتك ، مش لازم تضحى من اجل الناس وتيجي على مصلحتك وصحتك النفسية و الجسدية ، انت اهم ووقتك و مصلحتك ونفسيتك اهم ضع نفسك اول اولوياتك لو حواليك ناس بتذلك ومش بتحبك ومش بتقدرك ولا تحترمك ف انت متقدرش تغير الناس اللي حواليك (صفاتهم ) بس انت تقدر تغير الناس اللي حواليك ( كبنأدمين ) انت تستاهل الحب ، مش مهم الناس تحبك او تبقى فخوره بيك بس مهم لما تبص في المرايا تحب الشخص اللي انت شايفه .
وانا مثلا بدأت احب نفسي من ساعة ما بقيت اعاملها على انها انسانه اخرى شاركوني انتم بدأتم تحبوا نفسكم امتى ؟
